जीएसटी दरात बदल होण्याची शक्यता धूसर

‘करांतून मिळणाऱ्या महसुलाला प्रथम स्थिरता मिळावी आणि मगच जीएसटीच्या दरांमध्ये बदल करावा,’ असे मत जीएसटी कौन्सिलचे सदस्य सुशीलकुमार मोदी यांनी व्यक्त केल्याने जीएसटीच्या दरांमध्ये नजीकच्या काळात बदल होण्याची शक्यता मावळली आहे.

सुशील मोदी हे जीएसटी कौन्सिलचे सदस्य आणि बिहारचे उपमुख्यमंत्री आहेत. ‘भारत चेंबर ऑफ कॉमर्स’ला त्यांनी संबोधित केले. ते म्हणाले, ‘जीएसटीमधून महसूल उत्पन्नामध्ये स्थिरता येऊ दे. त्यानंतरच १२ आणि १८ टक्क्यांच्या करांमध्ये बदल करायचा, की दोघांचे एकत्रीकरण करायचे, यावर निर्णय होईल. कौन्सिलच्या गुवाहाटी येथील बैठकीत करांच्या संदर्भातील ९० टक्के मुद्द्यांचे निराकरण झाले असून उरलेल्या मुद्द्यांचे निराकरणही लवकरच होईल. सध्या केवळ ५० अशा गोष्टी आहेत, की ज्यावर २८ टक्के जीएसटी लागू आहे. जीएसटीच्या काळात केंद्र आणि राज्याचा महसूल वाढेल आणि जीएसटी अधिक परिपक्व होईल.’

लघु, मध्यम प्रकल्प, टेक्स्टाइल विभाग सध्या सर्वाधिक समस्यांना सामोरे जात असल्याचे त्यांनी कबूल केले. महसूल उत्पन्नामध्ये स्थिरता आली, की पेट्रोलियम उत्पादने, विद्युत आणि मालमत्ता मुद्रांक शुल्कालाही जीएसटीमध्ये आणण्याचा विचार कौन्सिल करील, असे त्यांनी सांगितले. उद्योगांनी करांतील कपातीचा फायदा ग्राहकांपर्यंत द्यावा, असे आवाहनही त्यांनी केले.