'मॅगी' पुन्हा बाजारात?

आरोग्यास धोकादायक घटक सापडल्यानंतर गेल्या दोन महिन्यांपासून नाहीशी झालेली मॅगीची उत्पादने पुन्हा बाजारात दिसण्याची शक्यता, खुद्द केंद्रीय ग्राहक व्यवहारमंत्री रामविलास पासवान यांनी व्यक्त केली आहे. नेस्लेच्या या प्रमुख उत्पादनावरील बंदीनंतर विदेशी गुंतवणूकदारांमध्ये भारताविषयी उत्पन्न होत असलेले शंकेखोर वातावरण नाहीसे करण्यासाठी सरकारतर्फे पुढाकार घेतला गेलाच पाहिजे असे मतही त्यांनी व्यक्त केले.

अलिकडेच मध्य प्रदेशमध्ये घेतलेल्या चाचणीत मॅगी उत्तीर्ण झाली होती. केंद्रीय अन्न तांत्रिक संशोधन संस्थेनेही मॅगीबाबत काहीही गैर आढळले नसल्याचा अहवाल जारी केला. मात्र या अहवालानंतर 'मॅगी आरोग्यास योग्य असल्याचा अद्याप निर्वाळा दिलेला नाही' असे भारतीय अन्न सुरक्षा व दर्जा प्राधिकरण- 'एफएसएसएआय'नेही स्पष्ट केले.

या पार्श्वभूमीवर पासवान यांनी मॅगीवरील बंदी उठण्याबाबत केलेले विधान आश्चर्यकारक ठरते. कोटय़वधींची उलाढाल असलेली लोकप्रिय मॅगी नूडल्स बाजारात पुन्हा येण्याविषयीचे संकेत त्यांनी उद्योजकांची संघटना 'अॅसोचेम'च्या व्यासपीठावरून दिली.

'एफएसएसएआय' या बंदी घातलेल्या यंत्रणेच्याच मान्यताप्राप्त केंद्रीय अन्न तांत्रिक संशोधन संस्थेने (सीएफटीआरआय) मॅगीबाबत ती आरोग्यास अपायकारक नसल्याचा निर्वाळा दिल्याने मॅगी पुन्हा बाजारात येऊ शकते, असा दावा त्यांनी केला. मॅगीवरील बंदी संबंधाने ग्राहक हित लक्षात घेऊनच निर्णय घेतला जाईल, असे स्पष्ट करत मॅगीवरील बंदीमुळे विदेशी गुंतवणूकदारांमध्ये नकारात्मक वातावरण तयार झाल्याचे निरीक्षण पासवान यांनी या वेळी नोंदविले.

उत्तर प्रदेशमध्ये प्राधिकरणाने कारवाई केल्यानंतर मॅगीच्या विक्रीवर बंदी घालण्यात आली होती. याविरोधात नेस्ले कंपनी न्यायालयात गेल्यानंतर तिला मॅगीच्या निर्यातीस मात्र परवानगी मिळाली आहे.